முற்றம் பெருக்குதல்

விடாத முதுகு வலிகளை

 வாரித் தள்ளிவிடுகிறது துடைப்பம் மனதினுள்

இறுக மூடிய கண்கள்

ஆழ்துயிலில் மூழ்கியிருக்கும் வீட்டு முற்றம்

அதிகாலையில்

குட்டி மண் முகடுகள் துளிர்த்திருக்கும்

முந்தைய இரவின் மழை
மண்தரையை சற்றே
இளக்கியிருக்கலாம்
மண்புழுக்கள் அடியில்
கிளறியிருக்கும்
தூக்கம் கூட இல்லாமல்
ஓய்வின்றி உழைத்திருக்கலாம்
தங்கள் சின்னஞ்சிறு மண் வீடுகளைக்
கட்டுவதற்காய்…

அவை இடித்துத் தள்ளப்பட்டிருக்கும்
சமமாக பரப்பி விடப் பட்டிருக்கும்
துடப்பம் விட்டுச் சென்ற
கைவிரல் போன்ற கோடுகளால்
துப்புரவு பெண்ணின்
குனிந்த பின்னடி வைப்புகளால் ஆன
‘காலை நடனத்‘திற்குப் பிறகு

துப்புரவு முடிந்தது
அதிகாலை வந்திறங்கியது
வெளிச்சம் பாய்ந்தது
வீட்டின் கண்கள் திறந்தன
கால் தடங்கள் இல்லை
உதிர்ந்த இலைகள் கூட இல்லை
எவ்வளவு சுத்தமாகி விட்டது!

செய்தித்தாள் வந்து சேர்ந்தது
அடியாழம் வரை சுத்தமாக்கப்பட்ட
இருள்
தயங்கி விழுந்தது மெல்ல கதவெதிரே

கிழிந்த ஆடையை சுத்தம் செய்து
கொண்டு எழுந்தாள்  
பேராவலுடன் பருகினாள் காபியை
கடைசி கசடுவரை

------ அனிதா தம்பி


(மலையாளத்திலிருந்து ஆங்கிலத்திற்கு மொழிமாற்றம் ஜெ,தேவிகா)

ஆங்கிலத்திலிருந்து தமிழுக்கு  இந்திராகாந்தி அலங்காரம்,